لما شفت الاعلان ده يوم مباراة مصر مع الجزائر فى بطولة افريقيا سألت نفسى هيا مصر اللى بتلعب ولا المنتخب اللى بيلعب
أللا دا اعلان فعلا خبيث , حسيت كدا كانه فى حد من ورا الشاشة بيطلعلى لسانه وهوا بيقول مصر بتلعب
ليه دايما بيتم السماح باقحام اسم مصر بصورة مجانية فى اعلانات المستفيد منها اصحابها بس , وأد كده بقى اسم مصر فى متناول
الجميع بسهولة؟
عندى احساس كده انه الموضوع مش بس اعلان تجارى دا كمان بيحمل رسالة موجهة(بكسر الجيم المشددة)الهدف منها
تعزيز النرجسية وتضخيم الذات اللى هما موجودين عندنا اصلا على المستوى القومى من خلال ابراز انه مصرهيا اللى بتلعب مش المنتخب وبالتالى انا وانت لاننا مصريين عظام من احفاد الفراعين هنحس انه كرامتنا على المحك وهنتابع بقوة ويمكن نشتم ويتحرق دمنا ونفرز دا على اللى حوالينا او على الجزائر وفريقها ونبدأ بذكر فضل مصر على الجزائر وتستمر دائرة اللوكلوك وانتو عارفين الباقى وفى النهاية اصحاب الرسالة المعلمين هما اللى بيفوزو
كفاية بقى نتكلم مع نفسنا طول الوقت واحنا مقتنعين بتفوقنا , دا احنا بقينا فى الحضيض
بالزمة لو احنا فى بلد تانى كان هيجرؤ اى راسمالى بربرى انه يذكر اسم البلد اللى هوا فيها ويقول انها بتلعب
شوف البلاد اللى حواليك وطريقة الاعلان مثلا:
احنا وراك يا الخضر او يا الازرق
والمقصود تشجيع الفريق مش الاستفادة من قومية البلد بطريقة انتهازية فجة
يا سادة اقرو اللى بين السطور وكفاية شوفينية غير مستحقة وسيبكم بقى من سماسرة الحضارة , هؤلاء الثعالب الذين يرتدون البدل والكرافتات الشيك واللى يهمهم فقط مصالحهم الشخصية وبيستخدمو حبهم المزعزم لمصر فى الوصول اليها.
بداية النجاح لاى شعب هو مواجهة عيوبه ومحاولة اصلاحها , مش عيب انى احب بلدى بس يكون حب ومعاه شوية احترام للاخر
وفى النهايه اقوللكم ايه ....
شجع شجع ... مصر بتلعب
جنوبى
